خرج مدير التصوير محمد شفيق مدير تصوير فيلم ” ديك العياط ” عن صمته ليكشف تفاصيل جديدة في ازمة الفنانة المصرية رحاب الجمل و الفنان باسم سمرة
حيث كتب محمد شفيق عبر حسابه الرسمي بموقع التواصل الاجتماعي ” فيس بوك ” أن ” بالنسبة لموضوع باسم السمرة و رحاب الجمل اللي خد حجم اكبر من حجمه أنا كنت في القعدة دي ..بصفتي مدير تصوير الفيلم ..اجتماع للتعارف مش بروفة و لا تصوير .. و الكلام اللي اتقال فيه حاجات كتير مش صح ..و الحقيقة إنه مجرد سوء تفاهم بين اتنين زملاء عادي ..رحاب عندها سفر و باسم عايز يصور قبل ما ينشغل في المسلسل بتاعه ”
و أضاف ” اختلفوا.. باسم قالها ما تسيبي الفيلم يا رحاب و هو متنرفز.. رحاب انسحبت.. كملنا القعدة و مشينا.. ما شفتش زعيق و خناق و أمن فندق و حشيش و الكلام الفاضي ده.. و ميصحش نطلع نشتم بعض في البرامج و نشوه صورتنا بإيدينا بحاجات محصلتش..و لو ما حصلش توافق و تناغم بين الناس عادي.. نعتذر عن العمل بهدوء من غير دوشة و برامج و حواديت و ده الهدف من اجتماع التعارف أصلا ”
و كانت قد هاجمت الفنانة المصرية رحاب الجمل زميلها الفنان باسم سمرة و وصفته ب ” الممثل السكران ” و ذلك أثناء مشاركتهما في فيلم ” الديك العياط ”
حيث كتبت رحاب الجمل عبر حسابها الرسمي بموقع التواصل الاجتماعي ” فيس بوك ” قائلة ” الممثل السكران .. لما تبقي سكران و تدخل فرح و تضرب زميل نجم بالكوع و يسامحك لأنه مستغلبك و مستضعفك.. انت بقي تعتبر إن ده حق مكتسب.. و بعدها بحوالي شهرين تدخل حفلة و تشتم و تهين مغني شاب و يكبر للناس اللي تدخلت في الموضوع و يسامحك بردو تعتبره حق مكتسب ”
و تابعت ” لكن تدخل بالأمس بروفة فيلم و انت سكران و عايز كمان تلف حشيش و لما نعترض تشتم و تهين زمايلك و تغلط و تتلفظ بأقذر و أسفل الشتائم قدام الأغراب في مكان عام.. ديه ما تتسامحش عليها لازم تتعاقب و بالقانون لأن ده قلة أدب و قلة مهنية و المرادي البلاغ للنائب العام علشان أرفع الحرج عن أي زميل أو زميلة في طلب المشاركة في البلاغ أو الشهادة يكفي تفريغ الكاميرات .. أنا هاربيك ”
إلا أنه قرر الفنان المصري باسم سمرة نفي كل كلام الفنانة المصرية قائلا ” الكلام مش بفلوس يا جملاوى ”
ثم أصدر الفنان المصري بيان رسمي جاء به ” فوجئت اليوم بإحدى الفنانات تنشر قصة عارية تماما عن الصحة و تختلق وقائع غير حقيقية و احتراما لنقابة المهن التمثيلية التي أتشرف بالانتماء إليها التي تعتبر البيت الكبير لكل فناني مصر فقد تقدمت بشكوى إلى نقيب المهن التمثيلية و آليت على نفسي عدم الرد على ما نُشر حتى تنتهي النقابة من التحقيق الذي ستُجريه مع احتفاظي الكامل بالرد القانوني على كل من شهر بي و بسمعتي و الله ولي التوفيق ”
